Categorías:
Os graduados sociais galegos participaron na tarde do xoves 14 de maio de 2026 nunha xornada formativa celebrada en formato híbrido, presencial na sede do Colexio Oficial de Graduados Sociais de Pontevedra, en Vigo, e en liña, que reuniu a case un centenar de asistentes.
A xornada foi organizada conxuntamente polos Colexios Oficiais de Graduados Sociais de Pontevedra, A Coruña e Ourense, en colaboración con Ibermutua Galega. O acto contou coa participación de Noemí Sordo Herrero, secretaria do Colexio Oficial de Graduados Sociais de Pontevedra; José Mª Santiago García, coordinador da Comisión de Formación e Cultura do Colexio Oficial de Graduados Sociais da Coruña e Ourense; e Verónica Díaz Molina, directora territorial en Galicia de Ibermutua Galega.
A conferencia foi impartida por Luis Esteban Leyenda Martínez, asesor xurídico de Ibermutua Galega e profesor do Grao de Relacións Laborais e Recursos Humanos da Universidade de Vigo, quen analizou as últimas novidades doutrinais e xurisprudenciais en materia laboral e de Seguridade Social.
Durante a súa intervención, o relator realizou un exhaustivo percorrido polas principais resolucións xudiciais ditadas en 2025 polo Tribunal Constitucional, Tribunal Supremo, Audiencia Nacional e Tribunais Superiores de Xustiza, así como polas sentenzas máis relevantes do primeiro trimestre de 2026.
Leyenda Martínez destacou tanto resolucións amplamente coñecidas e aplicadas na práctica profesional diaria como outras menos difundidas, pero de especial interese para os profesionais do ámbito laboral. Entre elas, a sentenza do Tribunal Supremo de decembro de 2024 que establece a imposibilidade de incrementar xudicialmente a indemnización prevista no artigo 56 do Estatuto dos Traballadores con contías adicionais derivadas de circunstancias do caso, así como a resolución de xaneiro de 2025 que permite alegar en demanda a nulidade do despedimento, aínda que na papeleta de conciliación unicamente #solicitar a improcedencia.
Por outra banda, abordáronse outras decisións relevantes relativas á regulación de incentivos vinculados ao absentismo e aos permisos por hospitalización de familiares, incluíndo o recoñecemento do repouso domiciliario tras a alta hospitalaria cando exista certificado médico.
O medio dixital [21 Noticias] tamén se fixo eco desta actividade formativa, destacando o interese e a actualidade dos contidos abordados durante a xornada.
