Estatutos

Artigo 13. Clases de colexiados

No Colexio de Graduados Sociais existirán catro clases de colexiados:

a) Exercente libre da profesión por conta propia ben de forma individual, ben de forma asociada ou colectiva.

b) Exercente da profesión por conta allea mediando unha relación laboral, e sempre que tal contratación sexa precisamente na súa calidade de graduado social.

c) Non exercente.

d) Emérito. Incluiranse nela os colexiados xubilados e as persoas que, por razón de circunstancias excepcionais apreciadas pola Xunta de Goberno, merezan esta consideración.

Artigo 14. Incorporación ao Colexio

A incorporación ao Colexio de Graduados Sociais require o cumprimento dos seguintes requisitos:

a) Ser maior de idade e non estar incurso en causa que impida o exercicio profesional.

b) Estar en posesión do título de Graduado Social, Graduado Social Diplomado, diplomado en Relacións Laborais ou grao en Relacións Laborais e Recursos Humanos ou os que, calquera que sexa a súa denominación, os substitúan ou se creen no futuro co alcance e nivel equivalentes ou do título estranxeiro homologado ou recoñecido en España como un dos anteriores.

c) Carecer de antecedentes penais que o inhabiliten para o exercicio da profesión.

d) Satisfacer a cota de ingreso e demais achegas que estableza o Colexio por acordo da Asemblea Xeral.

e) Xustificación da póliza de responsabilidade civil para o exercicio da profesión e obriga de comunicar calquera cambio nas súas condicións á Secretaría do Colexio.

Artigo 15. Requisitos do exercicio profesional

1. Será de incorporación obrigatoria ao Colexio de Graduados Sociais da Coruña e Ourense, coa excepción prevista no artigo 3 da Lei 11/2001, do 18 de setembro, a de todo aquel profesional que teña como domicilio profesional, único ou principal, calquera localidade da provincia da Coruña e Ourense, que estará facultado, sendo requisito indispensable e suficiente esta colexiación, para o exercicio da profesión de graduado social en todo o territorio nacional.

2. A incorporación ao Colexio de Graduados Sociais da Coruña e Ourense como exercente requirirá, ademais de cumprir as condicións xerais expresadas no artigo anterior, non estar incurso en causas de incompatibilidade ou que impidan o exercicio profesional.

3. Ademais, a pertenza ao Colexio Oficial de Graduados Sociais da Coruña e Ourense facultará, en concordancia coas leis que o regulan, ao exercicio profesional no ámbito da Unión Europea e en países terceiros.

4. Os profesionais titulados vinculados coa Administración pública mediante relación de servizos de carácter administrativo ou laboral non precisarán estar colexiados para o exercicio de funcións puramente administrativas nin para a realización de actividades propias da correspondente profesión por conta da Administración a que pertenzan, cando o destinatario inmediato daquelas sexa esa Administración. Si será obrigatoria, en consecuencia, a colexiación para o exercicio da actividade privada.

Artigo 16. Causas que impiden o exercicio profesional

Son circunstancias que impiden o exercicio da profesión de graduado social as que legalmente así se establezan e, entre elas, a título unicamente enunciativo, as seguintes:

a) A inhabilitación ou suspensión expresa para o exercicio da profesión en virtude de resolución xudicial ou corporativa firme.

b) As sancións disciplinarias firmes que comporten a suspensión do exercicio profesional ou a expulsión de calquera colexio de graduados sociais.

c) A invalidez no grao de incapacidade permanente total para a profesión de graduado social.

d) A incapacitación civil.

Artigo 17. Solicitude de colexiación

1. A colexiación solicitarase mediante instancia dirixida ao presidente do Colexio e xuntarase a esta a documentación pertinente. O Colexio disporá de medios necesarios para que os solicitantes poidan tramitar por medios electrónicos a súa colexiación, nos termos previstos pola lexislación en vigor.

O secretario do Colexio examinará a instancia, así como os documentos unidos a ela, emitirá o correspondente informe e someterá a solicitude á decisión da Xunta de Goberno, que aceptará ou denegará a solicitude de incorporación, dentro do prazo de dous meses contados desde a presentación da solicitude, sen prexuízo de que, cando proceda, poida requirir, con suspensión do prazo para resolver, a emenda de defectos da solicitude ou a achega de documentos necesarios, na forma e cos efectos previstos no artigo 71.1 da Lei 30/1992, do 26 de novembro, de réxime xurídico das administracións públicas e do procedemento administrativo común.

A resolución será notificada ao interesado por escrito, co visto e prace do presidente do Colexio.

A falta de resolución expresa da solicitude no prazo de dous meses determinará que a incorporación ao Colexio se entenda autorizada por silencio administrativo positivo.

2. Os solicitantes non admitidos poderán interpoñer recurso de alzada contra o acordo denegatorio, no prazo dun mes contado desde a notificación deste, ante o Consello de Colexios da Comunidade Autónoma a través da Xunta de Goberno, que emitirá informe do recurso, ou, no seu defecto, ante o Consello Xeral.

Transcorridos tres meses desde a interposición do recurso sen que se dite resolución, entenderase desestimado.

3. Os solicitantes non admitidos poderán retirar a súa documentación, agás a instancia, que quedará arquivada na Secretaría do Colexio con expresión das causas da denegación.

Artigo 18. Rexistro

1. Os novos colexiados quedarán inscritos no Rexistro Xeral do Colexio por orde de admisión de instancia.

2. Ademais do Rexistro Xeral, a Secretaría do Colexio terá ao seu cargo un rexistro especial de colexiados en exercicio, no cal se indiquen os que exercen a profesión:

a) Libre por conta propia ben de forma individual ou ben de forma asociada.

b) Por conta allea, mediando unha relación laboral cunha empresa ou corporación mediante relación especial.

3. A incorporación, xustificada mediante a certificación correspondente do Colexio, acredita o graduado social como tal sen que sexa necesario ningunha designación ou nomeamento da Administración pública.

4. O secretario do Colexio remitirá, ao principio de cada ano, a todos os xulgados e tribunais do seu territorio, así como aos organismos da Administración que teñan relación directa coa profesión, unha relación de todos os graduados sociais exercentes incorporados.

5. O rexistro será electrónico e incorporará non só os graduados sociais senón tamén as sociedades profesionais en cuxo obxecto se encontre o exercicio desta profesión.

Artigo 19. Dereitos e deberes dos admitidos

Os aspirantes admitidos satisfarán a cota de incorporación, que en ningún caso poderá superar os custos asociados á tramitación da inscrición.

Así mesmo, deberán aboar outras achegas, distintas da cota de incorporación e da cota derivada da condición de colexiado, que sexan aprobadas polo Colexio en concepto de derramas ou cotas extraordinarias e que sexan exixibles a todos os colexiados. Esta obriga estenderase exclusivamente ás cantidades pendentes de aboamento, sen que en ningún caso se lles poida exixir aos novos colexiados o pagamento de cotas ou derramas devindicadas en datas anteriores ás da súa incorporación, aboadas polos demais colexiados.

Artigo 20. Prestación de xuramento ou promesa

1. Os graduados sociais, antes de iniciaren o seu exercicio profesional, deberán prestar xuramento ou promesa de acatamento á Constitución e ao resto do ordenamento xurídico, e de fiel cumprimento dos deberes da profesión de graduado social.

2. O xuramento ou promesa prestarase ante a Xunta de Goberno do Colexio de Graduados Sociais, na forma que a propia Xunta dispoña, coa posibilidade de facelo por escrito de forma provisional.

3. No expediente persoal do colexiado deberá constar a prestación do xuramento ou promesa.

Artigo 21. Ámbito territorial do exercicio profesional

1. O graduado social incorporado a calquera colexio de graduados sociais poderá prestar os seus servizos profesionais libremente en todos os asuntos que lle sexan encomendados dentro do territorio do Estado español, no ámbito da Unión Europea e nos demais países, conforme a normativa vixente en cada caso.

2. Para o exercicio profesional polos graduados sociais en territorios distintos ao propio da súa colexiación, os colexios de graduados sociais non poderán exixir comunicación nin habilitación ningunha nin o pagamento de contraprestacións económicas distintas daquelas que exixan habitualmente aos seus colexiados pola prestación dos servizos de que sexan beneficiarios e que non se encontren cubertos pola cota colexial.

3. Nestes casos de exercicio profesional polos graduados sociais en territorio distinto ao de colexiación e para os efectos de exercer as competencias de ordenación e potestade disciplinaria que corresponden ao colexio do territorio en que se exerza a actividade de graduado social, en beneficio dos consumidores e usuarios, os colexios de graduados sociais deberán utilizar os oportunos mecanismos de comunicación e os sistemas de cooperación administrativa entre autoridades competentes, establecidos no capítulo VI da Lei 17/2009, do 23 de novembro, sobre o libre acceso ás actividades de servizos e o seu exercicio. As sancións impostas, se é o caso, polo colexio do territorio onde se exerza a actividade profesional producirán efectos en todo o territorio español.

4. No caso de desprazamento temporal a España dun profesional doutro Estado membro da Unión Europea, que pretenda o exercicio en España da profesión de graduado social, aplicarase o disposto na normativa vixente en aplicación do dereito comunitario relativa ao recoñecemento de cualificacións, en especial, o establecido no Real decreto 1837/2008, do 8 de novembro, polo que se incorporan ao ordenamento xurídico español a Directiva 2005/36/CE do Parlamento Europeo e do Consello, do 7 de setembro de 2005, e a Directiva 2006/100/CE do Consello, do 20 de novembro de 2006, relativas ao recoñecemento de cualificacións profesionais. Para exercer desta forma temporal, de acordo coa mencionada normativa, abondará coa comunicación á autoridade competente.

Artigo 22. Perda

1. A condición de colexiado pérdese:

a) Por defunción ou declaración de falecemento.

b) Por baixa voluntaria, mediante comunicación dirixida ao presidente do Colexio.

c) Por reiterado incumprimento da obriga de satisfacer as cotas ordinarias e extraordinarias que fosen acordadas, así como as demais cargas colexiais a que estea obrigado. Enténdese por reiterado incumprimento o atraso de tres meses no pagamento de forma sucesiva ou alterna no período dun ano.

d) Por condena firme que supoña a inhabilitación para o exercicio da profesión de graduado social.

e) Por sanción firme de expulsión do Colexio, acordada en expediente disciplinario.

2. Correspóndelle á Xunta de Goberno do Colexio acordar, en resolución motivada, a perda da condición de colexiado nos supostos das letras c), d) e e) e, por outro lado, os incisos a) e b) deberán ser adecuadamente comprobados e contrastados polos correspondentes servizos do colexio afectado.

3. As baixas serán comunicadas ao Consello Xeral e ao Consello Galego de Colexios Oficiais de Graduados Sociais, de ser o caso.

4. Anualmente, o secretario do Colexio porá en coñecemento dos xulgados e tribunais, e dos organismos da Administración que teñan directa relación coa profesión, os colexiados que causen baixa.

5. No suposto da letra c), os colexiados poderán rehabilitar os seus dereitos aboando o que deben, os seus xuros legais e a cantidade que corresponda como nova incorporación.

Artigo 23. Baixa de colexiados

1. O graduado social que cause baixa no Colexio perderá todos os dereitos inherentes a tal condición, e estará obrigado a devolver o carné de colexiado, sen prexuízo da responsabilidade en que poida incorrer por uso indebido deste. En caso de incumprimento da referida obriga, o Colexio anulará de oficio o carné de colexiado e comunicarállelo aos xulgados e tribunais en que o graduado social exercese a súa profesión, así como aos organismos da Administración que teñan directa relación coa profesión.

2. Para o caso de que o graduado social que cause baixa estivese adscrito a algunha póliza de responsabilidade civil común subscrita para todos os exercentes, comunicaráselle á entidade responsable da devandita póliza a perda da condición de exercente con expresión detallada da data de efectos desta.

3. Ademais, tramitará a baixa en todos os convenios en que, como graduado social, estivese obtendo beneficios.

Artigo 24. Causas de incompatibilidade

O exercicio profesional de graduado social terá as incompatibilidades establecidas por lei. Só mediante norma con rango de lei poderá impoñerse o exercicio de forma exclusiva dunha profesión ou limitar o exercicio conxunto de dúas ou máis profesións.

Artigo 25. Exercicio profesional ilegal ou clandestino

O Colexio de Graduados Sociais da Coruña e Ourense no ámbito territorial respectivo exercerá cantas accións, mesmo penais, procedan para evitar a intrusión profesional, polo que deberá ser demandado quen viñese exercendo funcións propias de graduado social clandestinamente ou, de forma pública e notoria, antes de solicitar a súa incorporación ao Colexio ou tras solicitar a súa baixa como exercente.

Artigo 26. Comunicación de incompatibilidades e recursos

1. O graduado social en quen concorra algunha das causas de incompatibilidade establecidas nas leis correspondentes deberá comunicarllo á Xunta de Goberno do Colexio e cesar inmediatamente na situación de incompatibilidade. De non o facer así, a Xunta de Goberno do Colexio acordará, logo de expediente con audiencia do interesado, a suspensión do graduado social no exercicio da profesión mentres subsista a incompatibilidade, e comunicarállelo aos xulgados e tribunais en que o graduado social exercese a súa profesión, así como aos organismos da Administración que teñan directa relación coa profesión.

No caso de que se teña coñecemento de que un graduado social exerce a profesión malia estar incurso nunha causa de incompatibilidade establecida nas leis, o correspondente colexio deberá incoar un expediente sancionador –que pode ir precedido dunha información acerca da entidade dos feitos– no curso do cal, e con audiencia do interesado, poderá acordar a súa suspensión no exercicio da profesión.

2. Desaparecida a incompatibilidade, o graduado social, logo de xustificación do dito aspecto, poderá instar da Xunta de Goberno do Colexio o alzamento da suspensión, que será resolto nos mesmos prazos que establecen estes estatutos para a incorporación ao Colexio.

3. O acordo polo cal se dá de baixa o graduado social por causa de incompatibilidade pode ser obxecto de recurso de alzada ante a Xunta de Goberno do Consello de Colexios da Comunidade Autónoma ou do Consello Xeral, de non existir aquel, nos termos establecidos na Lei de réxime xurídico das administracións públicas e do procedemento administrativo común.

4. A infracción do deber de cesar na situación de incompatibilidade así como o seu exercicio con infracción das incompatibilidades, directamente ou por persoa interposta, constituirá falta moi grave, sen prexuízo das responsabilidades que correspondan.

Artigo 27. Honras e distincións

Os graduados sociais colexiados gozarán dos dereitos, honras, preferencias e consideracións recoñecidos polas leis á profesión.

Artigo 28. Dereitos dos colexiados

Os colexiados terán os seguintes dereitos:

a) Permanecer no Colexio, salvo que incorran nalgunha das causas determinantes da perda da condición de colexiado recollidas nos estatutos.

b) Ser defendidos polo Colexio ante as autoridades, entidades e particulares no exercicio da profesión ou por motivo deste nas súas xustas reivindicacións.

c) Utilizar cantos servizos estableza o Colexio, entre eles biblioteca, institucións de previsión social e benéficas, publicacións e cantos outros poidan crearse, salvo aqueles que correspondan exclusivamente a colexiados exercentes.

d) Ser representados e apoiados pola Xunta de Goberno nas súas xustas reclamacións e nas negociacións por diferenzas que poidan xurdir como consecuencia do exercicio profesional.

e) Coñecer e estar informados da marcha do Colexio.

f) Asistir a cantos actos de carácter corporativo realice o Colexio.

g) Usar o carné de colexiado e a insignia correspondente.

h) Ser elixidos para os cargos da Xunta de Goberno do Colexio, do Consello Galego de Colexios Oficiais de Graduados Sociais ou do Consello Xeral, sempre que se reúnan os requisitos establecidos.

i) Participar no labor cultural e formativo que realice o Colexio.

j) Gardar o segredo profesional, entendendo este como a obriga e o dereito de non revelar ningún feito dos que teñan coñecemento por razón do exercicio profesional.

k) Usar toga en audiencia pública e actos solemnes xudiciais.

l) Usar a denominación de asesor na materia correspondente como expresión específica do contido da profesión. Tal denominación de asesor e calquera outra deberá ir sempre precedida da expresión graduado social.

m) Realizar publicidade dos seus servizos, sempre que sexa digna, leal e veraz, con absoluto respecto á dignidade das persoas, á lexislación sobre publicidade, sobre defensa da competencia e competencia desleal, axustándose en calquera caso ás normas deontolóxicas.

n) Aceptar ou rexeitar libremente calquera asunto ou cliente, así como renunciar a este en calquera fase do procedemento, sempre que non produza indefensión ao cliente.

ñ) Todos aqueles dereitos establecidos na Lei 11/2001, do 18 de setembro, reguladora dos colexios profesionais da Comunidade Autónoma de Galicia.

Artigo 29. Deberes

Os colexiados terán os seguintes deberes:

a) Exercer en todo momento a profesión co debido decoro e dignidade.

b) Exercer a profesión aténdose ás normas establecidas no código deontolóxico que aprobe o respectivo colexio, o correspondente consello autonómico ou o Consello Xeral de Colexios Oficiais de Graduados Sociais de España. Estes códigos deontolóxicos serán en todo caso conformes coas leis e accesibles por medios electrónicos, e neles precisaranse as obrigas dos graduados sociais, incluíndo as relativas a que as súas comunicacións comerciais sexan axustadas ao disposto na lei, coa finalidade de salvagardar a independencia e integridade da profesión, así como, se é o caso, o segredo profesional.

c) Actuar profesionalmente en toda ocasión baixo o seu nome e apelidos, sen prexuízo do previsto nos artigos 25 a 27 destes estatutos e do establecido na Lei 2/2007, do 15 de marzo, de sociedades profesionais.

d) Comunicar á Secretaría do Colexio, dentro do prazo de 30 días, os cambios de domicilio.

e) Satisfacer, dentro do prazo regulamentario, as cotas a cuxo pagamento están obrigados pola súa condición de colexiado, así como as derramas e demais cargas sociais.

f) Subscribir e manter unha póliza de responsabilidade civil nas contías mínimas exixibles, en cada momento, que a Asemblea Xeral aprobe.

g) Asistir persoalmente, salvo imposibilidade xustificada, ás xuntas xerais que teñan lugar no Colexio, e participar nas eleccións que regulamentariamente se deban levar a cabo.

h) Comparecer ante a Xunta de Goberno ou ante calquera das comisións existentes cando sexan requiridos para iso.

i) Comunicar ao Colexio as suplencias nas funcións profesionais por motivo de enfermidade, ausencia ou calquera outra causa.

j) Gardar a consideración e o respecto debidos aos membros da Xunta de Goberno e das comisións do Colexio e cumprir os acordos adoptados por eles.

k) Desempeñar con celo e eficacia os cargos para os cales fosen elixidos e participar nas comisións cando sexan requiridos para iso pola Xunta de Goberno.

l) Gardar o segredo profesional, entendendo este como a obriga e o dereito de non revelar ningún feito dos cales teñan coñecemento por razón do exercicio profesional.

m) Usar toga en audiencia pública e actos solemnes xudiciais.

n) Representar os litigantes que acrediten insuficiencia de recursos nos casos previstos pola lei.

ñ) Cando un graduado social, ao encargarse da dirección de calquera asunto profesional ou logo de iniciado este, teña coñecemento de que antes entendera outro compañeiro, deberá gardar cara a este a oportuna consideración, informándoo da súa decisión e solicitando del a venia.

o) Os graduados sociais non poderán prestar o seu título nin poderán ser contratados para figurar á fronte dos servizos propios da súa competencia en despachos ou empresas dedicadas á prestación de actividades a terceiros, entre as cales se atopan as propias do graduado social, salvo que estean integrados nun despacho colectivo.

p) Non poderá, en ningún caso, reter documentación do cliente, so pretexto de non ser saldados, total ou parcialmente, os honorarios, gastos ou suplidos, sen prexuízo do dereito de exixilos legalmente do modo que considere máis oportuno. A retención indebida de documentos será considerada falta grave.

Artigo 30. Exercicio conxunto da profesión

O graduado social poderá exercer a súa profesión conxuntamente con outros graduados sociais baixo calquera das formas que se recoñezan na lei. Tamén poderá exercer a súa profesión conxuntamente con outros profesionais titulados salvo que a lei o impida.

As sociedades a través das cales actúen deberán identificar o graduado social ou graduados sociais que presten os servizos. Os graduados sociais que exerzan a profesión en forma societaria deberán identificar nas súas relacións profesionais a sociedade a través da cal actúan.

Artigo 31. Rexistro de despachos colectivos

Os despachos colectivos de graduados sociais e, en particular, as sociedades profesionais, inscribiranse no Rexistro Especial de Despachos Colectivos do respectivo colexio, facendo constar os nomes e as circunstancias dos graduados sociais que os integren e cumprindo as obrigas de rexistro colexial que a cada un deles lle resulten aplicables conforme a lexislación vixente. As sociedades profesionais en cuxo obxecto se encontre o exercicio da profesión de graduado social serán titulares e estarán suxeitas aos mesmos dereitos e deberes que os graduados sociais.

Artigo 32. Requisitos

Todos os graduados sociais integrados nunha sociedade profesional ou despacho colectivo deberán estar incorporados individualmente ao colexio correspondente como exercentes.

Artigo 33. Órganos do Colexio

Os órganos do Colexio son os seguintes:

a) A Xunta Xeral de colexiados.

b) A Xunta de Goberno.

c) O presidente.

d) A Comisión Permanente, cuxa creación, duración e composición é potestativa da Xunta Xeral de colexiados, por proposta da Xunta de Goberno, nos termos do artigo 56.1 dos estatutos xerais.

Artigo 34. Competencia da Xunta de Goberno

1. O Colexio de Graduados Sociais rexerase por unha xunta de goberno, que será o órgano de execución e xestión dos acordos da Xunta Xeral, exercerá con carácter permanente a administración do Colexio e terá en todo momento a plena representación da corporación.

2. Ademais das que se establecen nestes estatutos, serán atribucións da Xunta de Goberno:

A) En xeral:

1ª. Someter a votación nas xuntas xerais asuntos concretos de interese colexial, na forma que estableza a propia Xunta de Goberno.

2ª. Resolver sobre a admisión de titulados que soliciten incorporarse ao Colexio.

3ª. Velar para que os colexiados observen boa conduta nas súas relacións cos órganos xurisdicionais, cos seus compañeiros e cos seus clientes, así como que no desempeño da súa función profesional despreguen a necesaria dilixencia e competencia.

4ª. Impedir o exercicio da profesión aos que, sendo colexiados ou non, a exercesen en forma e baixo condicións contrarias á legalidade vixente.

5ª. Impedir a intrusión e perseguir os infractores do regulado no ordinal anterior, así como as persoas naturais ou xurídicas que faciliten o devandito irregular exercicio profesional, e exercer fronte a elas cantas accións xurisdicionais sexan necesarias ou convenientes.

6ª. Propoñer á Xunta Xeral a adopción dos acordos que considere procedentes, en canto á cantidade que deba satisfacer cada colexiado por dereitos de incorporación.

7ª. Propoñer á Xunta Xeral a determinación das cotas que deben pagar os colexiados exercentes, os exercentes de empresa e os non exercentes, para sostemento das cargas e servizos colexiais.

8ª. Propoñer, se o considera necesario, a imposición de cotas extraordinarias aos seus colexiados, con aprobación da Xunta Xeral, e adoptar as medidas necesarias para a súa execución no caso de que aquelas sexan acordadas.

9ª. Recadar o importe das cotas establecidas para o sostemento das cargas do Colexio, que incluirán a repartición das cotas do Colexio para o Consello de Colexios da Comunidade Autónoma, de ser o caso, e para o Consello Xeral.

10ª. Convocar eleccións para prover os cargos da Xunta de Goberno.

11ª. Convocar xuntas ordinarias e extraordinarias, sinalando a orde do día para cada unha.

12ª. Exercer as facultades disciplinarias respecto aos colexiados, de acordo co previsto nestes estatutos.

13ª. Propoñer á Xunta Xeral a aprobación dos regulamentos de orde interior que xulgue convenientes.

14ª. Nomear as comisións ou seccións de colexiados que sexan necesarias para o estudo das materias que poidan interesar aos fins da corporación e á defensa e promoción do colectivo profesional.

15ª. Velar para que no exercicio profesional se observen as condicións de dignidade e prestixio que corresponden ao graduado social, provendo o necesario ao abeiro daquelas.

16ª. Informar os colexiados con prontitude de cantas cuestións coñeza e poidan afectalos, xa sexa de índole corporativa, colexial, profesional ou cultural.

B) Con relación aos órganos xurisdicionais:

1ª. Fomentar e estreitar as relacións de respectuosa cordialidade entre o Colexio e os seus colexiados coa maxistratura e os funcionarios ao servizo da Administración de xustiza en xeral, e cos xulgados do social e os seus funcionarios, en particular.

2ª. Promover a organización dun sistema de asistencia que permita contar cos servizos dun graduado social por parte dos que carezan de recursos económicos para sufragalos.

3ª. Velar para que no exercicio da función representativa que teñen os colexiados, de acordo coa Lei orgánica do poder xudicial, cumpran coas obrigas inherentes á súa función, de acordo co disposto no ordenamento xurídico profesional de aplicación.

4ª. Velar para que, nos mesmos casos, os graduados sociais cumpran as obrigas a que se refire a Lei orgánica do poder xudicial e, en audiencia pública, reunións dos órganos xurisdicionais en que proceda e actos solemnes xudiciais, usen toga e en estrados senten á mesma altura que as autoridades, funcionarios e profesionais mencionados no dito precepto.

5ª. Perseguir, nos mesmos casos, os comportamentos contrarios ao deber de gardar segredo dos asuntos que os colexiados coñezan por razón da súa actuación profesional e impoñer as sancións disciplinarias pertinentes.

6ª. Amparar os colexiados que, nos mesmos supostos, vexan vulnerado o seu dereito a non ser obrigados a declarar sobre os feitos ou noticias de que coñezan por razón de calquera das modalidades da súa actuación profesional.

C) Con relación aos organismos oficiais:

1ª. Defender, cando o considere procedente e xusto, os colexiados no desempeño das funcións da profesión ou con ocasión destas.

2ª. Promover no seo do Goberno, das autoridades e de cantos organismos oficiais con que teña relación a actividade de graduado social, canto se considere beneficioso para o interese común e para a recta e pronta administración de xustiza.

3ª. Emitir informe de palabra ou por escrito, en nome do Colexio, en cantos proxectos ou iniciativas o requiran.

D) Con relación aos recursos económicos do Colexio:

1ª. Recadar, distribuír e administrar os fondos do Colexio.

2ª. Redactar os orzamentos e render as contas anuais.

3ª. Propoñerlle á Xunta Xeral o investimento ou disposición do patrimonio colexial, se se trata de inmobles.

3. Correspóndelle igualmente á Xunta de Goberno velar por que os acordos, decisións e recomendacións con transcendencia económica se adapten ás exixencias da lexislación de defensa da competencia.

Artigo 35. Composición da Xunta de Goberno

1. A Xunta de Goberno comporase dun presidente, cargo que deberá recaer necesariamente nun colexiado en exercicio e que deberá continuar séndoo durante todo o seu mandato, que a presidirá; dous vicepresidentes, un secretario, un tesoureiro, un interventor-contador, un vicesecretario, catro vogais exercentes e dous vogais non exercentes.

Artigo 36. Elección de cargos á Xunta de Goberno

1. A Xunta Xeral elixirá o cargo de presidente por proclamación e mediante votación nominal específica. Os cargos da Xunta de Goberno de vicepresidente, tesoureiro, e interventor-contador serán designados pola propia xunta entre os vogais exercentes elixidos pola Xunta Xeral e a proposta do presidente.

2. Os cargos da Xunta de Goberno de secretario e vicesecretario serán designados pola propia xunta entre os vogais elixidos pola Xunta Xeral e a proposta do presidente.

3. Os cargos da Xunta de Goberno terán unha duración de catro anos, renovaranse a medias cada dous e poderán ser reelixidos sen limitación.

(Orde do 4 de novembro de 2020 pola que se aproba a modificación parcial dos estatutos do Colexio Oficial de Graduados Sociais da Coruña e Ourense. DOG Núm.: 230 - venres, 13 de novembro de 2020)

Artigo 37. Exercicio dos cargos

1. O exercicio dos cargos de presidente, vicepresidente, secretario, tesoureiro, interventor-contador, vicesecretario e vogais da Xunta de Goberno terán o carácter de honoríficos e gratuítos.

2. Poderán ser candidatos todos os colexiados pertencentes ao ámbito territorial do Colexio que estean de alta e ao día no pagamento das súas cotas colexiais, cun mínimo de dous anos de colexiación ininterrompida, no período inmediatamente anterior á convocatoria electoral, na modalidade para a cal optan, e que, tendo a condición de electores, non estean incursos en prohibición ou incapacidade legal ou estatutaria.

3. Non poderán formar parte da Xunta de Goberno os que non estean no pleno desfrute dos seus dereitos civís e corporativos.

Artigo 38. Provisión de cargos vacantes

1. Se por calquera motivo queda vacante algún ou algúns dos cargos da Xunta de Goberno antes da expiración do mandato regulamentario, o cargo vacante será provisto mediante acordo da propia Xunta de Goberno entre colexiados que reúnan as condicións de elixibilidade para o cargo de que se trate; os así designados deberán someterse a ratificación na primeira xunta xeral ordinaria que teña lugar ou ben extraordinaria que se poida convocar para o efecto e, en tal caso, exercerán o cargo polo período de mandato que reste ao substituído.

2. Exceptúase o presidente, que se substitúe regulamentariamente polo vicepresidente que corresponda ata a primeira xunta xeral ordinaria que teña lugar ou a extraordinaria que se poida convocar para a súa elección.

3. Tamén se procederá á elección parcial de vogais cando non sexa posible cubrir as vacantes polo sistema previsto no número 1.

4. Cando non sexa posible cubrir máis da metade das vacantes, o Consello Galego de Colexios Oficiais de Graduados Sociais ou, no seu defecto, o Consello Xeral, designará unha xunta provisional entre o primeiro terzo dos colexiados máis antigos, a cal convocará eleccións no prazo de trinta días.

Artigo 39. Electores e elixibles

1. Todos os membros da Xunta de Goberno serán elixidos por votación axustada ao principio de libre e igual participación dos colexiados. O voto de cada colexiado exercente, sexa libre por conta propia ou por conta allea, terá dobre valor, mentres que o dos non exercentes e eméritos terá valor simple.

2. Figurarán como electores todos os inscritos no censo que se atopen no exercicio dos seus dereitos e ao día nos seus deberes colexiais. O censo formarao a Xunta de Goberno ou, se é o caso, a Xunta Provisional; constarán nel todos os colexiados incorporados ao Colexio cun mes de antelación á data de convocatoria das eleccións e incluirá todos os datos que fagan posible a elección. A propia Xunta de Goberno ou, se é o caso, a Xunta Provisional, resolverá as reclamacións que poidan suscitarse, dentro dos tres días seguintes ao día da súa presentación, que, en todo caso, se deberá producir non máis tarde do quinto día anterior á elección.

3. Poderán ser candidatos os colexiados que, desfrutando da condición de electores, non estean incursos en prohibición ou incapacidade legal ou estatutaria e sexan proclamados de acordo coas normas e condicións estatutarias.

4. Tamén poderán ser candidatos os colexiados que, procedentes doutro colexio e desfrutando da condición de electores, non estean incursos en prohibición ou incapacidade legal ou estatutaria no colexio de procedencia, o cal procederá a certificar a alta colexial e a trasladar o expediente. Estes colexiados conservarán a antigüidade e modalidade colexial do colexio de procedencia.

Artigo 40. Votacións

1. A votación para a elección dos membros da Xunta de Goberno exercerase persoalmente en forma secreta ao se realizar a xunta xeral ordinaria de cada exercicio ou na extraordinaria que, para estes efectos, se deberá convocar nos casos de vacante do presidente ou da maioría dos vogais. A Xunta de Goberno poderá tamén convocar xunta extraordinaria co único obxecto de realizar separadamente a elección.

2. As votacións para esta elección de cargos vacantes da Xunta de Goberno serán sempre por papeleta e non serán válidas as designacións feitas por aclamación.

3. As papeletas serán azuis (voto dobre), para colexiados exercentes e de empresa, e brancas (voto simple), para os colexiados non exercentes e eméritos.

4. O voto poderá emitirse por correo certificado. Para iso, o elector solicitará da correspondente xunta de goberno, a partir da data da convocatoria e ata o décimo día anterior ao da votación, un certificado de inscrición no censo. Remitirá a Secretaría a devandita certificación ao domicilio que figure na base de datos do Colexio ou retiraraa persoalmente o interesado.

5. Para que o voto sexa válido deberá enviarse por correo certificado dirixido á Secretaría do Colexio nun sobre cuxas características será determinadas pola Xunta de Goberno para cada votación, que conterá a certificación de inscrición no censo e o sobre de votación pechado coa papeleta dentro.

6. No non regulado expresamente nestes estatutos para a elección dos membros da Xunta de Goberno observaranse o previsto na Lei orgánica de réxime electoral xeral vixente e as demais normas complementarias en canto sexan de aplicación.

Artigo 41. Convocatoria de eleccións e proclamación de candidatos

1. A convocatoria das eleccións faraa o vicepresidente no caso de elección unicamente do presidente e, nos demais casos, a Xunta de Goberno ou, de ser o caso, a Xunta Provisional, cunha antelación polo menos de trinta días naturais.

2. As candidaturas deberán presentarse na Secretaría do Colexio no seu horario de oficina, con quince días naturais de antelación, como mínimo, ao da realización das eleccións. Poderán ser conxuntas ou individuais e deberán subscribilas só os candidatos. Conterán o compromiso previo de prestar xuramento ou promesa segundo o establecido no Real decreto 707/1979, do 5 de abril, así como obediencia ao ordenamento xurídico profesional contido nestes estatutos.

3. A proclamación de candidatos faraa a Xunta de Goberno ou, se é o caso, a Xunta Provisional, dentro dos dous días hábiles seguintes ao da finalización do prazo para presentar as candidaturas. As impugnacións que se produzan, que se deberán interpoñer no prazo de dous días hábiles desde a notificación do acordo, serán resoltas pola mesma xunta de goberno antes de que teña lugar a votación.

Artigo 42. Mesa electoral e campaña electoral

1. A mesa electoral estará integrada por tres membros designados pola propia Xunta de Goberno, excluídos os que sexan candidatos e os asociados ou parentes ata o terceiro grao inclusive, por consanguinidade ou afinidade dos candidatos.

Serán presidente e secretario da mesa os que o sexan da Xunta de Goberno ou os que designe a Xunta de Goberno para substituílos. A mesa electoral tomará os seus acordos por maioría de votos dos seus compoñentes.

2. Cando o número de candidatos proclamados resulte igual ou inferior ao dos vogais da xunta que se vai elixir, a proclamación equivalerá á elección, e esta, polo tanto, non se deberá efectuar. Produciranse as mesmas consecuencias cando se trate da elección só de presidente e se proclame un único candidato.

3. Os candidatos proclamados poderán efectuar, á súa custa, as actividades de campaña electoral axustadas ao ordenamento xurídico. Non se poderán utilizar para tal efecto locais nin outros medios materiais ou persoais do Colexio, agás o dereito a que se lles facilite unha copia do censo electoral, así como os sobres e papeletas para a elección e, se é o caso, xogos de etiquetas cos enderezos de todos os colexiados.

4. Cada candidatura conxunta ou cada candidato individual poderá designar outro colexiado que actúe como interventor na mesa electoral, e isto deberá comunicalo por escrito á Xunta de Goberno, polo menos con dous días de antelación ao da votación. A Xunta de Goberno facilitaralle ao designado un documento acreditativo.

Artigo 43. Exercicio do voto e escrutinio

1. A votación efectuarase coincidindo co inicio da xunta xeral e terá unha duración mínima de dúas horas.

2. A votación terá lugar, en cada mesa electoral, en dúas urnas separadas, unha para colexiados exercentes libres por conta propia e por conta allea, e outra para non exercentes e eméritos. Os electores identificaranse ante quen presida a mesa e introducirán o sobre oficial na urna correspondente, o que se anotará na lista do censo. Votarán en último lugar os interventores, se os houber, e os membros da mesa. Por último, introduciranse nas urnas os votos recibidos por correo que cumpran os requisitos estatutarios.

3. Para os efectos de votación sinalaranse cun X os candidatos que se desexe votar e fixarase como tope de votación por colexiado o número de vacantes motivo das eleccións.

4. Serán válidas unicamente as papeletas e os sobres oficiais entregados polo Colexio aos candidatos e electores, que terán unhas e outros á súa disposición, na sede colexial, antes e durante a votación.

5. O escrutinio, realizado pola mesa electoral, será público, e autorizará o secretario a correspondente acta, que subscribirán os interventores e os demais membros da mesa. Incluiranse as reclamacións que procedan, que serán imprescindibles para ulteriores recursos. Só se conservarán aquelas papeletas que fosen obxecto de impugnación.

6. No caso de se producir empate en número de votos, será elixido o candidato de maior antigüidade no Colexio e, de ser igual, o de maior idade.

7. A Xunta de Goberno poderá adoptar as medidas necesarias para o voto electrónico por correo electrónico ou vía telemática, en calquera caso con certificado emitido por entidade certificadora que dea fe do contido e do remitente, e a un enderezo electrónico especial habilitado para tal fin, que será aberto e verificado o seu contido cando remate o escrutinio das papeletas, ao igual que os sobres recibidos por correo ordinario.

8. Contra os acordos da Xunta de Goberno e mesas electorais relativas ás eleccións poderán interpoñerse, salvo o expresamente previsto neste capítulo, os recursos, que non terán efectos suspensivos, establecidos con carácter xeral nestes estatutos.

Artigo 44. Constitución da Xunta de Goberno electa

1. No prazo de cinco días desde a constitución da Xunta de Goberno, comunicarase esta ao Consello Xeral e, se é o caso, ao Consello Galego de Colexios Oficiais de Graduados Sociais, e a través destes ao ministerio e á consellería autonómica correspondente, e informarase da súa composición e do cumprimento dos requisitos legais. Procederase de igual forma cando se produzan modificacións.

2. Os elixidos como presidente e demais membros da Xunta de Goberno, antes de tomaren posesión dos seus cargos, deberán proceder a prestar o xuramento ou promesa conforme o establecido no Real decreto 707/1979, do 5 de abril, así como obediencia ao ordenamento xurídico profesional contido nestes estatutos.

3. O presidente tomará posesión ante a Xunta Xeral no acto de ser elixido e os demais membros na primeira xunta de goberno.

Artigo 45. O presidente

1. O presidente exercerá a representación oficial e legal do Colexio, tanto en xuízo como fóra del e nas relacións cos poderes públicos e autoridades, outros colexios profesionais e colectivos de interese para a profesión de graduado social; será o executor dos acordos do Colexio; convocará e presidirá as sesións das xuntas xerais e das xuntas de goberno, así como das comisións de traballo a que asista; coordinará o labor dos distintos órganos colexiais, presidirá todos eles cando asista e resolverá os empates co seu voto de calidade se aqueles subsisten durante dúas votacións sucesivas.

2. O presidente do Colexio asumirá igualmente por delegación todas as funcións do Colexio nos casos de urxencia que así o requiran e poderá adoptar as resolucións e medidas pertinentes baixo a súa responsabilidade e coa reserva de sometelos ao coñecemento e validación da Xunta de Goberno.

3. O presidente do Colexio será o ordenador dos cobramentos e dos pagamentos, asinará a documentación colexial e autorizará co seu visto e prace as certificacións expedidas polo secretario e as actas da xunta xeral e da de goberno. A ordenación de cobramentos e pagamentos poderá delegala con carácter xeral no tesoureiro, caso en que o presidente as autorizará co seu visto e prace.

4. Incumbe ao presidente do Colexio, en particular, fomentar e manter entre todos os colexiados/as relacións de compañeirismo e a tutela dos dereitos da profesión, do Colexio e dos seus integrantes, ademais de cantas atribucións determinen os estatutos do Colexio.

5. Propor os graduados sociais que deban formar parte dos tribunais de oposición, nos casos en que sexa preceptivo, de entre os que reúnan as condicións para iso.

6. O período máximo de duración do cargo do presidente será de dous mandatos consecutivos e poderá desempeñar outros cargos nas xuntas de goberno, pero non poderá presentarse a un novo mandato para ocupar a Presidencia do Colexio sen que transcorrese, polo menos, un mandato desde que esgotase o seu último mandato como presidente electo.

Artigo 46. O vicepresidente ou vicepresidentes

1. O vicepresidente e, de ser o caso, os vicepresidentes pola súa orde, substituirán o presidente no caso de vacante, ausencia ou enfermidade e en todas aquelas comisións que lles encomende o presidente, con carácter permanente ou ocasional, e é necesario informar este do desenvolvemento das súas tarefas.

2. Nos casos xustificados, o vicepresidente ou vicepresidentes tamén poderá/n representar o Colexio para todos os efectos legais e, en caso de imposibilidade do presidente, asistirá/n no seu lugar ás xuntas do Consello Xeral con todos os seus dereitos e obrigas.

Artigo 47. O secretario

1. Correspóndelle ao secretario redactar as actas, correspondencia e comunicacións oficiais, dirixir os traballos administrativos do Colexio e levar o arquivo e a custodia da súa documentación.

2. O secretario terá tamén ao seu cargo a expedición de certificacións, co visto e prace do presidente, legalización, para os únicos fins corporativos, de sinatura de colexiados e redacción da memoria anual do Colexio.

3. Levará o rexistro dos colexiados, formará os expedientes persoais de todos os colexiados e publicará anualmente a lista dos colexiados.

4. O control directo e inmediato de todos os servizos colexiais e das persoas afectas ao seu equipo corresponderalle ao secretario.

5. Por acordo da Xunta Xeral o Colexio poderá contratar un xerente, profesional na materia, que deberá ser graduado social colexiado. En todo caso, o nomeamento e a remoción corresponderalle á Xunta de Goberno, e terá o xerente as funcións de xestión administrativa propias de toda xerencia, sen menoscabo das funcións estatutarias dos cargos electivos, salvo expresa delegación para concretos casos que acorden o presidente, o secretario ou calquera membro da Xunta de Goberno das súas facultades executivas estatutariamente recoñecidas a cada un.

Artigo 48. O tesoureiro

1. O tesoureiro materializará a recadación e custodia dos fondos do Colexio; dará a estes o investimento que corresponda segundo os acordos da Xunta de Goberno; levará inventario dos bens do Colexio, dos cales será administrador, e ingresará e retirará fondos das contas bancarias, conxuntamente co presidente.

2. Intervirá e supervisará todos os documentos contables, así como a redacción para a súa aprobación pola Xunta Xeral de todos os balances, contas e orzamentos, e o seu control.

3. Así mesmo, cando non haxa interventor/contador, o tesoureiro asumirá as funcións deste sinaladas no artigo seguinte.

Artigo 49. O interventor-contador

1. Correspóndelle ao interventor-contador a intervención de todos os documentos contables, así como a redacción para a súa aprobación pola Xunta Xeral de todos os balances, contas e orzamentos, e o seu control.

2. O tesoureiro e o interventor-contador substitúense reciprocamente no caso de vacante, ausencia ou enfermidade.

Artigo 50. Substitucións

Os cargos de vicepresidente segundo ou sucesivos ou de vicesecretario substituirán, respectivamente, o vicepresidente ou vicepresidentes, pola súa orde, e o secretario.

Na súa falta, a substitución efectuarase conforme se acorde, con carácter xeral ou para cada caso concreto, pola Xunta de Goberno, e, en casos de urxencia, polo presidente ou quen faga as súas veces.

Artigo 51. Funcionamento da Xunta de Goberno

(Orde do 5 de xullo de 2018 pola que se aproba a modificación parcial dos estatutos do Colexio Oficial de Graduados Sociais da Coruña e Ourense. DOG núm.: 138, do 19 de xullo de 2018).

1. A Xunta de Goberno reunirase de forma presencial ou a distancia, polo menos unha vez ao mes, salvo no mes de agosto, que se considerará como período vacacional e, en todo caso, sempre que a convoque o Presidente ou o solicite a cuarta parte dos seus compoñentes.

2. Nas sesións que se celebren a distancia, os seus membros poderán atoparse en distintos lugares coa condición de que se asegure por medios electrónicos (considerándose tamén tales os telefónicos e audiovisuais), a identidade dos membros ou persoas que os suplan, o contido das súas manifestacións, o momento en que estas se producen, así como a interactividade e  intercomunicación entre eles en tempo real e a dispoñibilidade dos medios durante a sesión. Entre outros, consideraranse incluídos entre os medios electrónicos válidos o correo electrónico, as  audioconferencias e as videoconferencias.

3. A convocatoria acordaraa o presidente e incluirá a orde do día, sen prexuízo de tratar aqueles asuntos que este declare urxentes, aínda que neste caso non poderán adoptarse acordos sobre os mesmos. Dita convocatoria deberá ser remitida mediante escrito con, polo menos, dous días de antelación, salvo en supostos de urxencia, expresando, ademais da orde do día, o lugar, o día e a hora da reunión. Poderanse utilizar para iso as novas tecnoloxías da comunicación que permitan ter constancia da súa recepción e lectura. 

4. A Xunta de Goberno quedará validamente constituída en primeira convocatoria se concorren de forma presencial ou a distancia a maioría dos seus compoñentes, e en segunda convocatoria se asisten de forma presencial ou a distancia o presidente, o secretario ou membros en que deleguen e tres vocais.

5. A asistencia ás sesións da Xunta de Goberno será obrigatoria para todos os seus membros. Será causa de cesamento e a consecuente substitución regulamentaria, acordados pola propia Xunta, a falta de asistencia inxustificada a tres sesións consecutivas ou cinco alternas no prazo dun ano.

6. Os acordos adoptaranse por maioría de votos de asistentes presenciais e a distancia, correspondendo ao Presidente o voto de calidade.

7. Os membros da Xunta poderán remitir, con dez días de antelación á data prevista para a celebración, propostas de asuntos a tratar na Xunta, que se incluirán na orde do día previa aprobación do Presidente.

Artigo 52. Comisión Permanente, comisións e ponencias

Dentro da Xunta de Goberno existirá unha comisión permanente integrada polo presidente, o vicepresidente, o secretario e o tesoureiro. Serán competencias dela todas aquelas que de forma expresa lle encomende a Xunta de Goberno dentro das competencias atribuídas a ela nestes estatutos. O Pleno da Xunta de Goberno deberá tomar coñecemento das decisións da devandita comisión permanente. En canto ao seu funcionamento e adopción de acordos, seralle de aplicación o disposto nos presentes estatutos para a Xunta de Goberno.

A Xunta de Goberno nomeará, de entre os seus membros, os compoñentes das comisións seguintes:

1. Comisión de Cultura, que terá por misión:

a) A organización de cursos, seminarios, conferencias e coloquios que crean convenientes para a formación e o perfeccionamento dos colexiados.

b) A organización, actualización e posta ao día da biblioteca do Colexio, que comprenderá, principalmente, obras e revistas de carácter profesional.

c) O servizo de información científica e técnica para os colexiados.

d) A edición da revista ou boletín que publique o Colexio para a información dos seus membros e dos organismos e entidades relacionados co seu labor.

e) A organización e o desenvolvemento, con carácter permanente, de seminarios ou equipos de traballo dedicados a afondar nas materias sociais e laborais.

2. Comisión de Relacións Públicas: terá o labor de propoñer e informar a Xunta de Goberno sobre asuntos de interese para a corporación, asistencia a actos en que debe estar representado o Colexio; a planificación e o desenvolvemento de actos públicos, contactos cos medios de comunicación social e organización de campañas de prensa, así como participación do Colexio en congresos e asembleas sobre problemas sociais e laborais.

3. Comisión de Ética e Honorarios Profesionais: deberá informar a Xunta sobre actividades dos colexiados que non se axusten á ética e á honra profesional.

4. Comisión de Intrusión: velará por que persoas ou entidades alleas á profesión de graduado social non invadan a súa esfera de acción contravindo os preceptos vixentes sobre a materia, efectuando propostas á Xunta de Goberno dos correspondentes expedientes administrativos ou accións ante a xurisdición que proceda, unha vez practicada sucinta información das denuncias e documentos que se lle participen.

5. Ademais das comisións que establecen os estatutos, a Xunta de Goberno poderá crear todas aquelas que considere oportunas, xa sexa con carácter permanente ou transitorio, determinando as súas respectivas misións e os labores, e o réxime do seu funcionamento.

6. Todas as comisións e ponencias serán presididas polo presidente do Colexio, se asistir, ou polo membro da Xunta de Goberno que designe. Os acordos terán o carácter de propostas, que deberán ser elevadas á Xunta de Goberno para a súa aprobación ou desestimación.

Artigo 53. Definición

A Xunta Xeral do Colexio, que pode ser ordinaria ou extraordinaria, é o órgano supremo de decisión colexial. Intégrana a totalidade dos graduados sociais adscritos ao Colexio que estean no pleno desfrute dos seus dereitos.

Artigo 54. Orde do día

1. A xunta xeral ordinaria terá lugar dentro do primeiro trimestre de cada ano para tratar os asuntos seguintes:

1º. Lectura e aprobación, se é o caso, da acta da xunta anterior.

2º. Exame e aprobación, se é o caso, da memoria anual.

3º. Exame e votación do balance e contas anuais de ingresos e gastos e do orzamento para o exercicio.

4º. Exposición polo presidente da actuación e desenvolvemento do Colexio durante o ano anterior, e do estado en que están as xestións realizadas en defensa dos intereses dos colexiados.

5º. Proposicións da Xunta de Goberno.

6º. Proposicións e rolda de intervencións dos colexiados.

7º. Elección de cargos vacantes, cando proceda e salvo que a Xunta de Goberno acorde convocar para iso xunta extraordinaria co único obxecto de realizala separadamente.

8º. Calquera outro asunto que non deba ser sometido á consideración da Xunta Xeral extraordinaria, incluída, se é o caso, a toma de xuramento aos colexiados.

2. O Consello Xeral ou, se é o caso, o Consello Galego de Colexios Oficiais de Graduados Sociais poderá autorizar que a realización da xunta xeral ordinaria teña lugar durante o segundo semestre do ano, se concorre causa suficiente para iso e por petición da xunta de goberno respectiva.

Artigo 55. Admisión de proposicións

1. As proposicións dos colexiados ante a Xunta Xeral ordinaria deberán ser entregadas á Xunta de Goberno para que esta as examine e forme criterio sobre elas, cunha antelación mínima de cinco días hábiles respecto da data en que debe ter lugar a reunión, e deberán levar como mínimo a sinatura de dez colexiados, dos cales sete como mínimo serán exercentes. A Xunta Xeral acordará, despois da súa lectura, se procede ou non discutir as proposicións así formuladas.

2. Dos requisitos anteriores exceptúanse as proposicións incidentais e de orde que presenten durante a realización da xunta un ou varios asistentes, sobre a procedencia da cal resolverá o que presida, e que nunca se poderán referir a asuntos que deban ser sometidos á consideración da Xunta Xeral e que non estean expresamente incluídos na orde do día.

Artigo 56. Requisito da convocatoria

1. As convocatorias ás xuntas xerais ordinarias ou extraordinarias faranse por escrito, en papeleta de citación nominativa, e enviaranse a cada un dos colexiados. Poderanse utilizar para iso as novas tecnoloxías da comunicación que permitan ter constancia da súa recepción e lectura.

2. A convocatoria deberá cursarse, polo menos, con oito días hábiles de antelación ao da súa celebración. En caso de urxencia, ao xuízo da Xunta de Goberno ou do presidente, poderá reducirse este prazo a cinco días hábiles.

Artigo 57. Convocatoria de xuntas extraordinarias

1. As xuntas xerais extraordinarias convocaranse por iniciativa da Xunta de Goberno ou ben por solicitude por escrito dunha terceira parte dos colexiados, na cal expresarán as causas que xustifiquen a petición, dirixida á Xunta de Goberno, e puntualizando os asuntos concretos que se deban estudar, con excepción de calquera outro.

2. A Xunta de Goberno só poderá denegar a convocatoria cando a petición que cumpra os requisitos expresados sexa contraria á lei ou allea aos fins colexiais. Noutro caso, iniciará os debates o primeiro asinante da petición.

3. A xunta xeral extraordinaria deberá ter lugar no prazo de trinta días naturais, computados desde o acordo da Xunta de Goberno ou desde a presentación da solicitude.

Artigo 58. Réxime xeral dos debates

1. As xuntas xerais ordinarias e extraordinarias terán lugar sempre no día e hora sinalados, ben sexa en primeira convocatoria, de asistir como mínimo a metade máis un dos colexiados, ou en segunda, trinta minutos despois, calquera que sexa o número de asistentes.

2. O presidente dirixirá os debates, poderá conceder ou suspender o uso da palabra e chamará á orde aos colexiados que se excedan na extensión ou alcance das súas discusións, non se cingan á materia discutida ou falten ao respecto á súa autoridade, a algún compañeiro, á Xunta ou á Asemblea, e poderá expulsar do local a quen, chamado á orde dúas veces, o desobedeza.

3. Como regra xeral, nos temas que sexan obxecto de debate só se permitirán, como máximo, dúas quendas a favor e dúas en contra, salvo nos asuntos de excepcional interese a criterio do presidente.

4. As xuntas xerais non se darán por rematadas mentres non se discutan e recaia acordo sobre todos os puntos da orde do día. Non obstante, salvo os casos de elección para cargos da Xunta de Goberno, poderá suspendelas quen as presida cando as sesións se prolonguen máis de catro horas, e continuarán o mesmo día ou o seguinte hábil.

5. O presidente poderá delegar nun membro da Xunta de Goberno a dirección de debates puntuais, e no secretario, tanto o debate xeral como a orde e o control das intervencións.

Artigo 59. Votacións

1. As votacións realizadas nas xuntas xerais serán de tres clases: ordinaria, nominal e por papeleta. Entenderase que existe unanimidade nunha votación cando, ao preguntar o presidente se se aproba o asunto sometido a debate, ningún colexiado manifeste o contrario. En todo caso, o presidente poderá propoñer que se realice a votación.

2. A votación ordinaria verificarase levantándose primeiro os que aproben a cuestión que se debate e despois os que a desaproben, e efectuarase sempre que a pida un colexiado.

3. A votación nominal realizarase dicindo cada colexiado asistente os seus dous apelidos, seguidos da palabra si ou non, e terá lugar cando o soliciten cinco colexiados como mínimo.

4. A votación por papeleta deberá realizarse cando afecte cuestións persoais dun ou máis colexiados, cando a pida a terceira parte dos asistentes á xunta ou a propoña o presidente. As votacións para o nomeamento de cargos vacantes da Xunta de Goberno serán sempre por papeletas e non serán válidas as designacións feitas por aclamación.

5. En toda votación, o sufraxio de cada colexiado en exercicio libre por conta propia ou por conta allea terá o valor de dobre, mentres que o do non exercente será considerado simple.

Artigo 60. Escrutinio

Sen prexuízo do establecido nestes estatutos para a elección de cargos vacantes da Xunta de Goberno, o secretario da corporación será o encargado de escrutar os votos emitidos nas xuntas xerais nos demais casos. Para tal efecto, será auxiliado por dous asistentes á reunión designados pola propia Xunta Xeral.

Artigo 61. Moción de censura

1. Os colexiados poden exercer o dereito de censurar o presidente ou algún dos membros da Xunta de Goberno ou esta en pleno.

2. A petición de moción de censura deberá vir subscrita por unha terceira parte dos compoñentes do Colexio e só se poderá adoptar en xunta xeral extraordinaria convocada expresamente con este único obxecto.

3. Para que teña lugar a xunta xeral, será necesario que asistan a ela a maioría absoluta dos colexiados. A mesma maioría absoluta deberá votar favorablemente a censura para que esta prospere.

4. Cando prospere a moción de censura, procederase a prover os cargos vacantes de acordo co previsto para tal suposto nestes estatutos, dando coñecemento de todo isto ao Consello Xeral e ao Autonómico, se é o caso.

Artigo 67. Delitos e faltas

Os graduados sociais están suxeitos a responsabilidade penal polos delitos e faltas que cometan no exercicio da súa profesión nos termos previstos na lexislación penal.

Artigo 68. Responsabilidade civil

Os graduados sociais están suxeitos a responsabilidade civil cando, por dolo ou neglixencia, danen os intereses que teñan confiados no exercicio da súa profesión. Esta responsabilidade será exixible conforme a lexislación civil ante os tribunais de xustiza.

CAPÍTULO III

DA RESPONSABILIDADE ANTE OS ÓRGANOS XURISDICIONAIS

Artigo 69. Correccións disciplinarias

Na súa actuación ante os órganos xurisdicionais, os graduados sociais están suxeitos ás correccións disciplinarias establecidas na Lei orgánica do poder xudicial e nas leis procesuais.

CAPÍTULO IV

DA RESPONSABILIDADE DISCIPLINARIA

Sección 1ª. Faltas e sancións

Artigo 70. Gradación das faltas

As faltas cometidas polos graduados sociais poden ser moi graves, graves e leves.

Artigo 71. Faltas moi graves

Son faltas moi graves:

a) A vulneración consciente e deliberada dos deberes e obrigas da profesión e, en particular, a que afecte de forma grave a dignidade da profesión polo incumprimento das regras que a gobernan de acordo co código deontolóxico.

b) A comisión de delitos dolosos, en calquera grao de participación, como consecuencia do exercicio da profesión.

c) A infracción do réxime de incompatibilidades establecido legalmente.

d) O atentado contra a dignidade ou honra dos membros do Consello Xeral, dos consellos de comunidades autónomas e da Xunta de Goberno cando actúen no exercicio das súas funcións e contra os compañeiros no exercicio profesional.

e) A alteración maliciosa dos datos consignados en documentos que expidan ou outorguen.

f) Ter sido condenado pola realización de actos de competencia desleal.

g) A participación activa en actuacións constitutivas de intrusión profesional, sempre que exista condena xudicial firme.

h) A vulneración dos intereses dos consumidores e usuarios dos seus servizos profesionais.

i) A intervención en asuntos en que exista causa de incompatibilidade, mesmo sobrevida, sen cesar na súa intervención, así como o exercicio da profesión en situación de inhabilitación profesional.

j) O quebrantamento no cumprimento dunha sanción colexial firme.

k) A vulneración do segredo profesional.

l) O exercicio da profesión en situación de inhabilitación profesional ou estando incurso en causa de incompatibilidade ou prohibición.

m) A comisión de, polo menos, dúas infraccións graves no prazo de dous anos.

Artigo 72. Faltas graves

Son faltas graves:

a) A demora, neglixencia ou descoidos reiterados no cumprimento dos deberes e obrigas profesionais e corporativos que causen notorio prexuízo ou quebrantamento.

b) O incumprimento das normas estatutarias ou dos acordos adoptados polos órganos colexiais no ámbito da súa competencia.

c) O reiterado incumprimento da obriga de atender as cargas colexiais, salvo que constitúa falta de maior gravidade.

d) A falta de respecto, por acción ou omisión, aos membros do Consello Xeral, do Consello de Graduados Sociais de Galicia e á Xunta de Goberno cando actúen no exercicio das súas funcións.

e) A falta do respecto debido a autoridades, clientes ou compañeiros no exercicio da profesión.

f) A falta inxustificada a unha citación do presidente do Consello Xeral, Autonómico ou do Colexio cando cause grave prexuízo á corporación.

g) A contravención do deber de solicitar a venia nos termos establecidos nestes estatutos.

h) Os actos e omisións descritos nas letras a), b), c), d) e f) do artigo anterior cando non teñan entidade suficiente para consideralos como moi graves.

Artigo 73. Faltas leves

Son faltas leves:

a) A demora ou neglixencia no desempeño das funcións profesionais que teñan encomendadas, sempre que non ocasione prexuízo ou quebrantamento notorio.

b) A falta de respecto aos membros de Consello Xeral, do Consello Autonómico e da Xunta de Goberno no exercicio das súas funcións.

c) Os actos enumerados no artigo anterior cando non teñan entidade suficiente para ser considerados como graves.

Artigo 74. Sancións

As sancións que poden impoñerse son:

1. Por faltas moi graves:

a) Suspensión do exercicio da profesión por un prazo superior a seis meses sen exceder os dous anos.

b) Suspensión dos dereitos colexiais por un prazo superior a seis meses sen exceder os dous anos.

c) Expulsión do Colexio.

2. Por faltas graves:

a) Suspensión do exercicio da profesión por un prazo non superior a seis meses.

b) Suspensión dos dereitos colexiais por un prazo non superior a seis meses.

3. Por faltas leves:

a) Reprensión persoal.

b) Apercibimento por escrito.

Sección 2ª. Procedemento

Artigo 75. Competencia

1. O procedemento para a imposición de sancións por faltas disciplinarias axustarase ao previsto na lexislación administrativa xeral relativa ao exercicio da potestade sancionadora.

2. Compétenlle á Xunta de Goberno a incoación do expediente disciplinario e o nomeamento de instrutor na persoa da Xunta en quen se delegue e, se é o caso, do secretario.

3. A imposición de sancións é da exclusiva competencia da Xunta de Goberno, que adoptará os seus acordos por maioría de votos emitidos secretamente entre os membros presentes en sesión convocada para o efecto, excluído o membro da Xunta de Goberno que realice a función de instrutor do expediente.

4. A sanción que se impoñerá por falta moi grave debe ser adoptada pola Xunta de Goberno mediante votación secreta e coa conformidade das dúas terceiras partes dos membros que a compoñan. O membro da Xunta que, inxustificadamente, non concorra deixará de pertencer ao órgano reitor do Colexio.

Artigo 76. Competencias en relación cos membros das xuntas de goberno

1. As facultades disciplinarias en relación cos membros da Xunta de Goberno do Colexio corresponde ao Consello Autonómico ou Consello Xeral, no seu defecto.

2. Contra o acordo do consello correspondente, nos casos previstos nos parágrafos precedentes, caberá recurso potestativo de reposición ante o mesmo consello que adoptou o acordo e, en todo caso, recurso contencioso-administrativo.

Artigo 77. Proporcionalidade

Na imposición das sancións deberase gardar a debida proporción entre a gravidade do feito constitutivo da infracción e a sanción aplicada, considerándose especialmente os seguintes criterios para a gradación da sanción que se vai aplicar:

a) A existencia de intencionalidade ou reiteración.

b) A natureza dos prexuízos causados.

c) A reincidencia, por comisión no prazo dun ano de máis dunha infracción da mesma natureza cando así sexa declarado por resolución firme.

Artigo 78. Execución

1. As sancións disciplinarias executaranse unha vez que sexan firmes en vía administrativa.

2. As sancións que impliquen suspensión do exercicio da profesión ou expulsión do Colexio terán efectos no ámbito de todos os colexios de graduados sociais de España. Para ese fin deberán ser comunicadas ao Consello Xeral para que este as traslade aos demais colexios, que se absterán de incorporar ou habilitar o sancionado mentres estea vixente a sanción.

Artigo 79. Extinción da responsabilidade disciplinaria

1. A responsabilidade disciplinaria dos colexiados extínguese polo cumprimento da sanción, a morte do colexiado, a prescrición da falta e a prescrición da sanción.

2. A baixa no Colexio non extingue a responsabilidade disciplinaria contraída durante o período de alta, senón que se concluirá o procedemento disciplinario e a sanción quedará en suspenso para ser cumprida se o colexiado causa novamente alta no Colexio.

Sección 3ª. Prescrición

Artigo 80. Prazos de prescrición das faltas

1. As faltas moi graves prescribirán aos tres anos, as graves aos dous anos e as leves aos seis meses.

2. O prazo de prescrición das infraccións comezará a contarse desde o día en que a infracción se cometese.

3. Interromperá a prescrición a iniciación, con coñecemento do colexiado, do procedemento sancionador, e continuará de novo o prazo de prescrición se o expediente sancionador está paralizado durante máis de dous meses por causa non imputable ao colexiado inculpado.

Artigo 81. Prazos de prescrición das sancións

1. As sancións impostas por faltas moi graves prescribirán aos tres anos, as impostas por faltas graves aos dous anos e as impostas por faltas leves ao ano.

2. O prazo de prescrición das sancións comezará a contarse desde o día seguinte a aquel en que adquira firmeza a resolución pola cal se impón a sanción.

3. Interromperá a prescrición a iniciación, con coñecemento do colexiado, do procedemento de execución, e volverá transcorrer de novo o prazo se aquel está paralizado durante máis de seis meses por causa non imputable ao colexiado sancionado.

4. O prazo de prescrición da sanción cando o colexiado sancionado quebranta o seu cumprimento comezará a contarse desde a data do quebrantamento.

Sección 4ª. Anotación de correccións e sancións disciplinarias

Artigo 82. Anotación

1. As correccións disciplinarias que impoñan os xulgados ou tribunais ao graduado social faranse constar en todo caso no expediente persoal.

2. As sancións disciplinarias corporativas faranse constar en todo caso no expediente persoal.

Sección 5ª. Cancelación de sancións disciplinarias

Artigo 83. Supostos de cancelación

1. A anotación das sancións de reprensión persoal e apercibimento por escrito quedarán canceladas polo transcurso do prazo de seis meses desde que adquiriu firmeza, se durante ese tempo non dá lugar o sancionado a outro procedemento disciplinario que finalice coa imposición de sanción.

2. A anotación da sanción de suspensión poderá cancelarse, por instancia do interesado, cando transcorran polo menos dous ou catro anos desde a imposición firme da sanción, segundo que se trate de falta grave ou moi grave, sempre e cando durante ese tempo non dea lugar o sancionado a novo procedemento disciplinario que finalice coa imposición de sanción.

3. O colexiado sancionado coa expulsión do Colexio poderá solicitar da Xunta de Goberno a rehabilitación cando transcorran polo menos seis anos desde a imposición firme da sanción. Para tal efecto, instruirase o oportuno expediente, con audiencia do interesado, que resolverá a Xunta de Goberno de forma motivada en votación secreta, para o cal será necesario o voto favorable das dúas terceiras partes dos seus membros.

4. A reincorporación do colexiado sancionado non suporá a rehabilitación dos seus dereitos senón a incorporación como novo colexiado, coas obrigas e deberes que lle corresponden.