O presidente do Colexio Oficial de Graduados Sociais da Coruña e Ourense, José Lage Cerviño, asistiu o venres 6 de marzo á toma de posesión de María Azucena Recio González como presidenta da Sala do Contencioso-Administrativo do Tribunal Superior de Xustiza de Galicia, acto que se celebrou na sede do tribunal na Coruña.
A cerimonia estivo presidida polo presidente do TSXG, Ignacio Picatoste Sueiras, quen defendeu a independencia e o rigor do Poder Xudicial ante as incertezas derivadas da nova organización xudicial. Na súa intervención subliñou que o novo marco legal representa tamén unha oportunidade para avanzar cara a unha xustiza máis eficiente, próxima á cidadanía e sólida na súa estrutura.
Durante o acto, María Azucena Recio González, apadriñada polo expresidente do TSXG José María Gómez y Díaz-Castroverde, afirmou que asume o cargo co compromiso de exercelo con independencia, integridade, responsabilidade e pleno sometemento á lei e ao dereito, destacando o papel da xudicatura como garantía dos dereitos da cidadanía.
A toma de posesión contou coa presenza de membros da Sala de Goberno do TSXG, do vogal do Consello Xeral do Poder Xudicial, Bernardo Fernández Pérez, así como de diversas autoridades xudiciais, civís e militares.
[slide]
[/slide]