Categorías:
Etiquetas:
Na mañá do día 19 de abril de 2018, celebrouse o acto principal do Centenario da Real Institución Benéfico Social Padre Rubinos, baixo a presidencia da súa Maxestade a Raiña Dona Sofía. A tan destacado evento asistiron, convidados polo Presidente da Institución, unha representación do Colexio de Oficial Graduados Sociais da Coruña e Ourense formada por Dª Susana Soneira Lema e D. José Ramón Lage Cerviño, Presidenta e Vicesecretario-Coordinador da Comisión de Relacións Públicas, así como diversas Autoridades Civís e Militares da Provincia e unha ampla representación da vida social Coruñesa.
Tras un discurso de presentación que correu a cargo do Presidente da Institución D. Eduardo Acea García, tomaron a palabra en calidade de membros do Comité de Honra do Centenario D. Xulio Ferreiro Baamonde, Alcalde do Concello da Coruña; D. Alberto Núñez Feijoo, Presidente da Xunta de Galicia e o Abad da Colexiata, Pai José María Fuciños que, en nome da súa Santidade o Papa Francisco, fixo entrega da Bendición Apostólica á citada Institución.
[slide][/slide]
Despois da proxección dun vídeo, no que se recolle a actividade diaria do centro, finalízase o acto coa interpretación, do que vai ser desde hoxe o himno oficial da Institución, pola eurovisiva cantante Lucía Pérez e acompañada da Real Banda de Gaitas de Ourense.
A Presidenta e Vicesecretario deste Colexio, aproveitaron a ocasión para falar tanto co Presidente da Institución, ao que agradeceron a deferencia pola invitación, así como co Delegado do Goberno, Presidente da Xunta de Galicia e o Alcalde da nosa cidade entre outras autoridades, para deixar de manifesto a participación do noso colectivo nun acto de marcado espírito social e colaborador coas persoas maiores e cos máis desfavorecidos.
[slide][/slide]