Categorías:
Etiquetas:
O pasado venres 15 de xullo celebráronse no salón de actos de Deputación Provincial as I Xornadas Laboralistas de Lugo que contaron coa presenza do Presidente da Sala do social do Tribunal Supremo, Jesús Gullón Rodríguez que impartiu a primeira conferencia da sesión "Subsidio por desemprego na Lei Xeral da Seguridade Social e na Lei de Infraccións e Sancións. Problemas Prácticos".
Na súa intervención mostrouse partidario de que o Goberno actualice a lei sobre Infraccións e Sancións na Orde Social (Lisos) sobre todo en materia de desemprego. Segundo Gullón esta lei que é do ano 2000, necesita un bo repaso, pois pasaron 16 anos polo que se deben retocar moitas figuras e melloralas.
A segunda das intervencións estivo a cargo da tamén maxistrada do Tribunal Supremo, Lourdes Arastey Sahún, que falou sobre "Sucesión de empresas á luz da doutrina do Tribunal de Xustiza da Unión Europea e do Tribunal Supremo", destacando que hai bastante litigiosidad na sucesión de empresas nas concesións públicas.
Esta cuestión precisamente preocupa ao presidente da Deputación, Darío Campos que lembrou os problemas que tiveron os concellos coas contratacións en servizos como os grupos de emerxencias, a axuda de fogar, ou as escolas de música.
O anteriormente mencionado Darío Campos, Presidente da Deputación deu a benvida a todos os membros da mesa presidencial, que estaba formada polo Presidente da Audiencia Provincial, José Antonio Varela Agrelo, Raquel Arias Rodríguez, Delegada Territorial da Xunta de Galicia en Lugo, o Presidente do Colexio Oficial de Graduados Sociais de Lugo, Manuel Núñez e o Presidente do Consello Xeral, Javier San Martín que foi o encargado de realizar o acto de inauguración.
A última das intervencións da xornada realizouse a través dunha Mesa redonda formada por Ana Maria Pita Grandal, Decana da facultade de Ciencias Xurídicas e do Traballo de Vigo, Mercedes Montes Rodríguez, Directora da Escola Universitaria de Relacións Laborais de Lugo e Jesús Anxo Vázquez Forno, Fundación Escola Universitaria de Relacións Laborais da Coruña, que falaron sobre "Os criterios para unificar para elaborar o Máster de Acceso á Profesión e o exame de Estado" . Esta mesa estivo moderada por Raúl Gómez Villaverde, Presidente do Colexio Oficial de Graduados Sociais de Pontevedra, membro da Comisión que desenvolve o regulamento sobre a quenda de oficio. Tras a finalización desta mesa o Presidente do Consello Xeral, Javier San Martin, tivo ocasión de intervir ante os alí presentes, para explicar dunha maneira persoal e directa a necesidade de establecer un sistema de acceso á profesión que outorgue ao colectivo de Graduados Sociais a capacidade e o mérito necesario para o exercicio da mesma e igualdade de condicións que o resto dos operadores xurídicos.
Neste sentido comentouse co público asistente un grao de 60 créditos con 30 lectivos e 30 prácticos pero en definitiva un máster de acceso da mesma natureza xurídica e capacidade que o da avogacía.
Esta xornada converteuse nun foro de expertos do Dereito do Traballo reunindo aos profesionais da xudicatura, da administración e da universidade da Xunta.
Os presidentes dos Colexios de Asturias, Coruña, León, Pontevedra e Valencia xunto co membro da Comisión Permanente, Germán Prieto Puga quixeron acompañar ao Presidente do Colexio lucense neste acto que converte a esta Xornada na primeira realizada en terras galegas.
Non queremos finalizar sen destacar o labor realizado polo director académico das Xornadas Laboralistas, José Luis Tortuero Praza, Catedrático de Dereito do Traballo e Seguridade Social da Universidade Complutense de Madrid e de Luís Rodríguez García (Lois Caeiro) director do Diario O Progreso, que actuou como moderador da Xornada. Todos eles, colaboraron para conseguir o rotundo éxito dunha convocatoria que finalizou con clausúraa a cargo da Alcaldesa accidental, Ana Prieto Neto e coa presenza tamén de Ramón Carballo, Subdelegado do Goberno en Lugo.
[slide]
[/slide]